Vüqar Bilal oğlu Muradov 18 noyabr 1967-ci ildə Bakı şəhərində anadan olmuşdur. O, 1986-cı ildə Əzim Əzimzadə adına Rəssamlıq Məktəbini bitirmiş, sonra Mədəniyyət və İncəsənət İnstitutunun Rəngkarlıq fakültəsində təhsil almışdır. O, 1990-cı illərdə o, "Vətən səsi” və "Millət” qəzetlərində, jurnallarda rəssam işləmiş, həmçinin "Azərxalça” Elmi-İstehsalat Birliyinin baş rəssamı qismində xalça dizaynı ilə məşğul olmuşdur.

Rəssamın işləri İlk dəfə Rəssamlar İttifaqında təşkil olunan sərgidə nümayiş olunmuşdur. Rəngkarın “Simalar” silsiləsinə aid olan “Muğam”, “Adəm və Həvva”, “Mancanaqlı köhnə neft buruğu” rəsmləri olduqca diqqət çəkəndir.

Vüqar Muradov 1998-ci ildə Vaşinqtondakı “Lobbi Qalareyası”nda təşkil olunan “Müasir Azərbaycan rəssamları” sərgisində iştirak etmişdir.. Rəssam 2006-cı ildə  “Türksoy-9” proyekti çərcivəsində sərgidə, 2008-ci ildə Danimarkada Beynəlxalq İncəsənət Festivalında iştirak etmişdir. 2017-ci ildə o, Şimali Amerikanın ən iri beynəlxalq müasir incəsənət sərgisi olan Art Basel Miami (ABŞ) tədbirinə əl işlərini təqdim edən yeganə azərbaycanlı rəssam olmuşdur.

Vüqar Muradovun 2001-ci ildə Fransanın Azərbaycandakı səfirliyində, 2009-cu ildə  Bakıda “VüqART” kimi fərdi sərgiləri keçirilmişdir.

Rəssamın əsərləri Azərbaycan, ABŞ, Fransa, Almaniya, Yaponiya, Lüksemburq, Rusiya, Hollandiya, İran və digər ölkələrdə dəfələrlə nümayiş olunmuş, muzeylərdə və şəxsi kolleksiyalarda saxlanılır.

Vüqar Muradov 1997-ci ildə Azərbaycan Rəssamlar İttifaqının, 2007-ci ildən Azərbaycan "Karikaturaçı Rəssamlar Birliyi"nin, Beynəlxalq FEKO təşkilatının, 2017-ci ildə Muradov UNESCO-nun Beynəlxalq Rəssamlar Federasiyasına üzv seçilmişdir.

Azərbaycan Respublikası Prezidentinin 27 may 2018-ci il tarixli Sərəncamına əsasən Əməkdar rəssamı fəxri adına layiq görülmüşdür.