Natiq Şəfiq oğlu Səfərov 5 avqust 1960-cı ildə Şamaxıda anadan olmuşdur. O, 1975-1980-ci illərdə Əzim Əzimzadə adına Dövlət Rəssamlıq Məktəbi, 1980-1984-cü illərdə Mərkəzi Elmi Bərpa Layihə Emalatxanalarında (Moskva) təhsil almışdır.

Rəssam 1992-ci ildən MDB Ölkələrinin Bərpaçılar Assosiasiyası, 1996-cı ildən Azərbaycan Rəssamlar İttifaqı, ICOM Azərbaycan Milli Komitəsinin üzvüdür.

Natiq Səfərov Azərbaycan, Avropa, Uzaq Şərq ölkələrinin rəssamlarının, rus rəssamlarından Ayvazovski, Sorvasov və s., Azərbaycan rəssamlarından Səttar Bəhlulzadə, Tahir Salahov, Asəf Cəfərov, Maral Rəhmanzadə, Mikayıl Abdullayev və başqalarını əsərlərini bərpa və konservasiya etmişdir.

O həmçinin Abdulla Şaiq adına Azərbaycan Dövlət Kukla teatrının foesində Toğrul Nərimanbəyovun divar rəsmi, Azərbaycan Respublikasının Milli Məclisinin foesində Toğrul Nərimanbəyovun divar rəsmi, Şəkidə Şəkixanovlar sarayı, Gəncə şəhərində fəaliyyət göstərən “Urban” Mərkəzinə Gəncədə Hüseyniyyə (Tatlar) Məscidindən demontaj edilmiş Toğrul Nərimanbəyovun şərti olaraq “Poeziya ağacı” adlandırılan 80 m2 əsərin montajı (2019) və s. irihəcmli bərpaları həyata keçirmiş, Azərbaycan Respublikasının Dövlət Şəhərsalma və Arxitektura Komitəsində yerləşən divar rəsmlərinin bərpasıyla məşğuldur (ilk bərpa 1982).

Natiq Səfərov eyni zamanda rəngkarlıqla məşğuldur. Rəssamın əsərləri Azərbaycan Dövlət Rəsm Qalereyasında, Azərbaycan Milli İncəsənət Muzeyi və xarici ölkələrdə muzey və qalereyalarda saxlanılmaqdadır.

O, 1980-ci ildən Muzey Sərvətləri və Xatirə Əşyalarının Elmi Bərpa Mərkəzində çalışmış, hal-hazırda Azərbaycan Milli İncəsənət Muzeyinin Elmi-bərpa şöbəsinin müdiri, Mədəniyyət Nazirliyi yanında Ekspert Komissiyası, Mədəniyyət Nazirliyində Ekspert məsləhətçisi, Heydər Əliyev Mərkəzinin Ekspert məsləhətçisidir.

Natiq Səfərov 1984-cü ildə SSRİ Ali Attestasiya Komitəsi tərəfindən “Ali dərəcəli bərpaçı-rəssam”, 2013-cü ildə Azərbaycan Respublikasının Əməkdar rəssamı, 2017-ci ildə Azərbaycan Respublikasının Mədəniyyət Nazirliyinin “Fəxri mədəniyyət işçisi” döş nişanı ilə təltif olunmuşdur.