Fikrət Əli oğlu İbrahimli 2 iyun 1955-ci ildə Neftçala rayonun Xıllı kəndində anadan olmuşdur. O, 1976-cı ildə Əzim Əzimzadə adına Dövlət Rəssamlıq Məktəbini, 1982-ci ildə M.A.Əliyev adına Azərbaycan Dövlət İncəsənət İnstitutunu bitirmişdir. Rəssam rəssamlıq məktəbində oxuyarkən dahi Səttar Bəhlulzadə ilə ünsiyyətdə olmuş, Xalq rəssamı Toğrul Nərimanbəyovdan dərs almışdır.

Fikrət İbrahimli 1988-ci ildən Azərbaycan Rəssamlar İttifaqının üzvüdür. O, 1978-ci ildən respublika və beynəlxalq sərgilərin fəal iştirakçısıdır. Rəssamın əsərləri Moskva, Gürcüstan, Almaniya, Çexoslavakiya, Türkiyə və Azərbaycanda nümayiş  olunmuşdur.

Fikrət İbrahimli “Dəniz, günəbaxanlar”, “Fatmayı”, “Bağ evi-Novxanı”, “Abşeron motivi”, “Abşeron günəbaxanları”, “Van Qoq günəbaxanları”, “Nişan.Rəfiqələr”, “Kəndimizin qızları”, “Xonça aparırlar”, “Gəlin gətirməyə”, “Toy” və s. əsərlərin müəllifidir.

Fikrət İbrahimlinin yaradıcılığının 50 illiyinə həsr olunmuş “Ruhumun təqdimatı-Ömür səhifələrim” adlı ilk fərdi sərgisi  Muzey mərkəzində (Bakı,2022) keçirilmişdir.