Eldar Hacıbala oğlu Qurbanov 20 yanvar 1948-ci ildə Bakı şəhərində anadan olmuşdur. O, 1965-1969-cu illərdə Əzim Əzimzadə adına Azərbaycan Dövlət Rəssamlıq Məktəbinin Rəngkarlıq fakültəsini, 1981-1986-cı illərdə isə Azərbaycan Pedaqoji Universitetinin Bədii qrafika fakültəsini bitirmişdir. 1973-cü ildə o, ilk dəfə olaraq “Xəzər dənizində bayram” əsəri ilə rəsm sərgisində iştirak etmişdir.  Rəssam 1989-cu ildə Xəzəryanı Respublikaların Bienalisində "Şair və Muza" əsərinə görə birinci dərəcəli diplom və qızıl medala layiq görülmüşdür. O, 1994-cü ildə Azərbaycan Rəssamlar İttifaqının Sultan Məhəmmədin xatirəsinə həsr olunmuş müsabiqəsinin laureatı olmuşdur. Rəssam Musiqili Komediya Teatrında teatr rəssamı kimi fəaliyyət göstərmiş, Gənc Tamaşaçılar Teatrında “Dədə Qorqud” tamaşasına tərtibat vermişdir. O, Elçin Məmmədovla birlikdə Naxçıvan teatrında “Elektra” üzərində işləmişdir.

 Eldar Qurbanov "Azərbaycanın bütün nəğmələri" (1988, Rusiya), Beynəlxalq Rəssamlıq Simpoziumu (ABŞ) və digər sərgilərin iştirakçısıdır. Onun əsərləri Azərbaycan Rəssamlar İttifaqında, Rusiya Rəssamlar İttifaqında, Tretyakov qalereyasında, Hyustonda "Ramko" İncəsənət Mərkəzində, İstanbulda, o cümlədən Azərbaycanda və xaricdə şəxsi kolleksiyalarda saxlanılır.

 Rəssamın ilk böyük fərdi sərgisi 1995-ci ildə Səttar Bəhlulzadə adına sərgi salonunda təşkil olunmuşdur. 29 fevral 2008-ci ildə rəssamın 60 illik yubileyi münasibətilə Azərbaycan Respublikası Mədəniyyət və Turizm Nazirliyinin Muzey Mərkəzində fərdi sərgisi açılmışdır. Eldar Qurbanovun eləcə də Bakı İncəsənət Mərkəzi (1987, 1996), Bəstəkarlar evi (Moskva, 1992), “Raap`s Art Gallery” (1997. Berlin), “Renaissance” (1997. İstanbul), Bakı Miniatür Mərkəzi (1998), “Humay” Azərbaycan İncəsənət Mərkəzi (2001. London), “March” qalereya (2009. Sankt Peterburq) fərdi sərgiləri keçirilmişdir.

Eldar Qurbanov müxtəlif janrlarda, primitivizm və abstrakt üslublarında əsərlər işləmişdir. Onun “Akvarium” (2009), “Qış mənzərəsi. Şəki”, “Qırmızı ağaclarla mənzərə”, “Park” silsiləsindən “Yay günü”, “Muğam oxuyan qadın”, “Mənzərə”, “Trafik”, “Darıxdırıcı gün”, “Dekolte” və s. əsərləri vardır.

 O, 1979-cu ildən SSRİ Rəssamlar İttifaqının üzvü, 2002-ci ildə Azərbaycan Respublikasının Əməkdar rəssamı fəxri adına layiq görülmüşdür.

Eldar Qurbanov 2021-ci ildə 3-cü dərəcəli “Əmək” ordeni ilə təltif edilmişdir.