Arif Şahbaz oğlu Hüseynov 30 oktyabr 1943-cü ildə Bakının Qala kəndində anadan olmuşdur. O, 1960-1962-ci illərdə Əzim Əzimzadə adına Dövlət Rəssamlıq Məktəbində, 1965-1972-ci illərdə Azərbaycan Dövlət Mədəniyyət və İncəsənət İnstitutunda təhsil almışdır.

O, 1975-ci ildən Rəssamlar İttifaqının üzvüdür. Tələbəlik illərindən məşhur “Göyərçin” uşaq jurnalı ilə əməkdaşlığa başlayan Arif Hüseynov hazırda onun baş rəssamı vəzifəsində çalışmaqdadır.

Arif Hüseynov böyük söz ustalarından N.Gəncəvi, M.Füzuli, M.Ə.Sabir, H.Cavid, S.Vurğun, R.Rza və digər klassiklərimizlə bağlı yaratdığı əsərlər dəzgah qrafikasının ən gözəl nümunəsi sayılır. Yetmişinci illərdə R.Rzanın “Vaxt var ikən” kitabına çəkdiyi illüstrasiyalardan başlanan və A.Məsudun “Hekayələr”inə kimi davam edən “kitab həyatı” ona uğur gətirmişdir. Rəssamın 1980-ci ildə M.Ə.Sabirin “Hophopnamə”sinin “Yazıçı” nəşriyyatında hazırlanan yeni nəşrinə  orijinal tərtibat vermişdir. O, 2012-ci ildə  “Hophopnamə”nin yubiley nəşri ilə əlaqədar 40 əsərdən ibarət kitab qrafikası yaratmışdır.

Rəssamın fərdi sərgilərindən "100 illüstrasiya" (1984, Bakı-Moskva), "Daikokuya" qalereyası (2006.Tokio,Yaponiya), Galerie Berlin-Baku, Berlin (2009. Bakı-Berlin) və qrup sərgilərindən "BAM" sərgisi (1977. Bakı-Moskva), Qrafika sərgisi, (1980, Bakı), "Dostluq palitrası" (1985. Bakı-Moskva-Praqa), "Füzuli-500" (1994. Bakı İncəsənət Mərkəzi), Çank Art ( 2007. Ankara), "Şərqdən şərqə" bədii sərgi ( 2009. Bakı) və s. adlarını qeyd etmək olar.

Arif Hüseynov “Xalq Bank”ın 2017-ci ildə nəşr etdiyi “Aşıq ədəbiyyatı antalogiyası” üçcildliyinə illüstrasiylalar çəkmişdir. O, “Azərbaycan nağılları”, “Novruz”, “Bakı və bakılılar”, “Qala kəndinə ithaf”, “Qarabağnamə-tarixin səhifələri”, “Qarabağnamə” və s. silsilələrinin, "Qarabağ şikəstəsi", "Mis qablar", "Aşıq", "Kəndirbazlar" və s. əsərlərin müəllifidir.

Arif Hüseynov 1992-ci ildə Azərbaycan Respublikasının əməkdar rəssamı fəxri adına, 1996-ci ildə “Bakılı” cəmiyyətinin təsis etdiyi beynəlxalq “Humay” mükafatına, 2006-cı ildə Azərbaycan Respublikasının Xalq rəssamı fəxri adına layiq görülmüş, 2008-ci ildən isə Azərbaycan Respublikası Prezidentinin fərdi təqaüdçüsü olmuşdur.

2009-cu ildə Mədəniyyət Nazirliyi tərəfindən "Arif Hüseynov-Orxan Hüseynov" adlı kataloq dərc olunmuşdur.

Arif Hüseynovun dəzgah və kitab qrafikası sahələrində yaratdığı müxtəlif mövzulu əsərləri Azərbaycan Milli İncəsənət Muzeyi, Moskvada Rusiya Dövlət Şərq Xalqları İncəsənəti Muzeyi, Azərbaycan Dövlət Rəsm Qalereyasında, həmçinin şəxsi kolleksiyalarda saxlanılmaqdadır.

Rəssamın 2013-cü ildə 70 illik yubileyi ilə əlaqədar qrafika əsərlərindən ibarət “Azərbaycan nağılı” adlı fərdi sərgisi, 2018-ci il oktyabr ayının 19-da Azərbaycan Dövlət Rəssamlıq Akademiyasının sərgi salonunda  "75 illik Yubiley sərgisi" keçirilmiş, "Arif Hüseynov Məqalələr, Müsahibələr, Fotolar" adlı kitabı çap olunmuş, 80 illik yubileyi və yaradıcılığının 55-ci ili münasibətilə Azərbaycan Milli Xalça Muzeyində “Azərbaycan nağılı” adlı sərgi təşkil olunmuşdur.

Arif Hüseynovun 2019-cu il 30 oktyabr tarixində "Azərkitab" kitab mərkəzində böyük Azərbaycan şairi İmadəddin Nəsiminin anadan olmasının 650 illiyinə həsr olunmuş "Kitab qrafikası" adlı fərdi sərgisi və "Arif Hüseynov-qrafika" kitabının təqdimatı keçirilmişdir.